CAMBODIA
CAMBODIA
ប្រាសាទសំបូរព្រៃគុក បានចុះបញ្ជីក្នុងសម្បត្តិបេតិកភណ្ឌពិភពលោករបស់អង្គការយូណេស្កូ (UNESCO) នៅថ្ងៃទី៨ ខែកក្កដា ឆ្នាំ២០១៧ ក្នុងកិច្ចប្រជុំកំពូលលើកទី៤១ នៃគណៈកម្មាធិការបេតិកភណ្ឌពិភពលោក នៅទីក្រុងក្រាកូវ (Krakow) ប្រទេសប៉ូឡូញ។ ប្រាសាទទាំងនេះ សាងសង់អំពីថ្មបាយក្រៀម ឥដ្ឋតាន់ និងថ្មភក់ ក្នុងរជ្ជកាលព្រះបាទឥសានវរ្ម័នទី១ (គ.ស.៦១៦-៦៣៥) នាសម័យចេនឡា ដើម្បីឧទ្ទិសថ្វាយ ព្រះសិវៈ ក្នុងលទ្ធិព្រហ្មញ្ញសាសនា លើផ្ទៃដីប្រមាណ ៣០០០ ហិកតា។ ប្រាសាទសំបូរព្រៃគុក ជារាជធានីចាស់ឈ្មោះថា ឦសានបុរៈ កាលពីសម័យនោះជាមជ្ឈមណ្ឌលនៃព្រហ្មញ្ញសាសនា៕
ភ្នំសន្ទុកជាភ្នំសក្ការៈដ៏សំខាន់មួយនៅខេត្តកំពង់ធំ មានកម្ពស់ប្រហែល ២០៧ម៉ែត្រ ពីលើជ្រលងទន្លេសាប។ អ្នកអាចឡើងដល់កំពូលភ្នំតាមជណ្តើរ ៨០៩ជំហាន ដែលត្រូវបានតុបតែងដោយរូបចម្លាក់នៅតាមផ្លូវ ឬតាមផ្លូវកៅស៊ូប្រវែងប្រហែល ២.៥គីឡូម៉ែត្រ។ នៅលើកំពូលមានប្រាសាទជញ្ជាំងពណ៌ស ជាមួយនឹងព្រះពុទ្ធបដិមាច្រើនអង្គដែលខ្លះធ្វើពីថ្ម និងមានព្រះសង្ឃគង់នៅទីនោះ។ ភ្នំនេះក៏ពាក់ព័ន្ធនឹងរឿងព្រេង “បក្សីចាំក្រុង” ដែលពន្យល់អំពីប្រភពឈ្មោះ និងសារៈសំខាន់ផ្នែកវប្បធម៌។ ពីលើកំពូលភ្នំ អ្នកអាចមើលឃើញទេសភាពទូលំទូលាយនៃវាលស្រែ និងជ្រលងទន្លេសាប ដែលមានភាពស្រស់ស្អាតជាពិសេសនៅពេលថ្ងៃលិច។ កន្លែងនេះក៏ជាទីទាក់ទាញទេសចរណ៍ និងកន្លែងបូជាសក្ការៈសំខាន់សម្រាប់ប្រជាពលរដ្ឋផងដែរ។
រមណីយដ្ឋានស្ទឹងជីនិត គឺជារមណីយដ្ឋានធម្មជាតិកែច្នៃមួយ ស្ថិតនៅជាប់ព្រំប្រទល់រវាងស្រុកបារាយណ៍ និងស្រុកសន្ទុក ក្នុងខេត្តកំពង់ធំ។ រមណីយដ្ឋាននេះស្ថិតនៅចម្ងាយប្រហែល ៣៧ គីឡូម៉ែត្រ ពីទីរួមខេត្ត ដោយធ្វើដំណើរតាមផ្លូវជាតិលេខ៧ មកដល់ទីប្រជុំផ្សារកំពង់ថ្ម ហើយបន្តដំណើរទៅកាន់ទីតាំងរមណីយដ្ឋាន។ ស្ទឹងជីនិតមានទេសភាពធម្មជាតិស្រស់ស្អាត ជាមួយទឹកស្ទឹងថ្លា បរិយាកាសត្រជាក់ និងព័ទ្ធជុំវិញដោយព្រៃឈើ។ វាជាកន្លែងសម្រាប់សម្រាកកម្សាន្ត ញុំាអាហារ និងលំហែកាយ ជាពិសេសនៅថ្ងៃឈប់សម្រាក ដែលទាក់ទាញភ្ញៀវទេសចរជាច្រើនមកទស្សនា។