CAMBODIA
CAMBODIA
សារមន្ទីរខេត្តបន្ទាយមានជ័យ ត្រូវបានបង្កើតឡើងឆ្នាំ២០០៤ នៅក្រុងសិរីសោភណ្ឌ ដើម្បីរក្សាទុក និងអភិរក្សវត្ថុបុរាណមានតម្លៃ ដូចជា រូបចម្លាក់ ភាជន៍ និងសម្ភារៈលោហៈ ពីសម័យបុរេប្រវត្តិសាស្ត្រដល់សម័យអង្គរ។ វត្ថុភាគច្រើនបានមកពីការកំណាយ បង្ក្រាបការលួចជីក និងការបរិច្ចាគ។ សារមន្ទីរធ្វើការអភិរក្ស រៀបចំ និងចុះបញ្ជីសារពើភណ្ឌ ដើម្បីថែរក្សាបេតិកភណ្ឌវប្បធម៌។ បើកឱ្យចូលទស្សនាឥតគិតថ្លៃ ពីថ្ងៃចន្ទដល់សុក្រ (៨–១១ព្រឹក និង ២–៥ល្ងាច)។
ប្រាសាទ បន្ទាយឆ្មា កសាងឡើងក្នុងរជ្ជកាលព្រះបាទជ័យវរ្ម័នទី៧ ចន្លោះពីឆ្នាំ១១៨១ ដល់ឆ្នាំ១២១៩ ។ ប្រាសាទនេះកសាងឡើងដើម្បីឧទ្ទិសចំពោះព្រះពុទ្ធសាសនាមហាយាន និងដើម្បីឧទ្ទិសដល់វិញ្ញាណក្ខន្ធបុត្រា ស្រីន្ទកុមារ និងមេទ័ពទាំងបួន ដែលមានងារជា «អ្នកសញ្ជត» របស់ព្រះអង្គដែលបានពលីជីវិក្នុងសមរភូមិចម្បាំងបង្ហូរឈាមជាមួយចាមនាពេលនោះ។សព្វថ្ងៃប្រាសាទនេះមានសភាពទ្រុឌទ្រោមខ្លះ ប៉ុន្តែនៅតែស្រស់ស្អាតជាទីគយគន់ដែលហ៊ុមព័ទ្ធដោយទេសភាពខៀវស្រងាត់ជាមួយនិងដើមឈើធំៗ។
ប្រាសាទបន្ទាយទ័ព ស្ថិតនៅស្រុកថ្មពួក ខេត្តបន្ទាយមានជ័យ មានចម្ងាយប្រហែល ៨ គីឡូម៉ែត្រពីស្រុក និង ៦ គីឡូម៉ែត្រពីផ្លូវលេខ ៥៦។ ដើមកាល អ្នកស្រុកហៅថា «បន្ទាយទាប» ព្រោះមានកំពែងទាប ប៉ុន្តែក្រោយមកបានប្ដូរឈ្មោះជា «បន្ទាយទ័ព»។ ប្រាសាទនេះមិនមានសិលាចារឹក ប៉ុន្តែអ្នកស្រាវជ្រាវគិតថា ត្រូវបានកសាងនៅសម័យព្រះបាទជ័យវរ្ម័នទី៧ ក្នុងដើមសតវត្សទី១៣ ដើម្បីឧទ្ទិសដល់ព្រះពុទ្ធសាសនាមហាយាន។ រចនាសម្ព័ន្ធមានកំពែង៤ជាន់ រួមមានកំពែងដី និងថ្មបាយក្រៀម។ នៅកណ្ដាលមានប្រាង្គ៥ (មួយធំ និង៤តូចនៅជុំវិញ) ភ្ជាប់គ្នាដោយរោងទង។ ប្រាសាទកសាងដោយថ្មយកមកពីប្រាសាទចាស់ និងមានកម្ពស់ប្រហែល ៣៥ ម៉ែត្រ។ បច្ចុប្បន្ន នៅសល់ផ្នែកខ្លះដូចជា ធ្នឹម និងពិដានឈើមានក្បាច់លម្អ ប៉ុន្តែខូចខាតខ្លះក្រោយព្រឹត្តិការណ៍ឆ្នាំ ១៩៩៧។